यावल नगरपरिषदेच्या नाकावर टिच्चून नदी,नाल्यासह सार्वजनिक रस्त्यांवर सर्रासपणे अतिक्रमण

यावल नगरपरिषदेच्या नाकावर टिच्चून नदी,नाल्यासह सार्वजनिक रस्त्यांवर सर्रासपणे अतिक्रमण.

पावसाळ्यापूर्वी नदी नाल्यातील साफसफाई दूरच.

मुख्याधिकारी महसूल व पोलिसांनी संयुक्त कारवाई करावी यावलकरांची मागणी.

यावल (सुरेश पाटील): नगरपरिषद कार्यक्षेत्रात नदी-नाले किनारपट्टीवर तसेच सार्वजनिक रस्त्यावर आणि ठिकठिकाणी मोकळी जागा असेल त्या ठिकाणी यावल नगरपरिषदेच्या नाकावर टिच्चून सर्व प्रकारचे बांधकाम सोयीनुसार आणि सर्रासपणे सुरू आहे याकडे हितसंबंधांमुळे आणि निवडणुकांमध्ये मतदानावर डोळा ठेवून 90 टक्के लोकप्रतिनिधी सुद्धा आपले डोळे आणि तोंड बंद ठेवीत असल्याने यावल नगरपरिषद हद्दीत अतिक्रमणाचा सपाटा बिनधास्तपणे सर्रासपणे बिनबोभाट सुरू आहे, तसेच राज्यात पावसाळ्यापूर्वी सर्व ठिकाणी नदी-नाले यांच्या पात्रातील साफसफाई करून पावसाळ्यातील नदीनाल्यांना आलेला पूर पाणी वाहून जाण्यासाठी व्यवस्था केली जाते परंतु यावल नगरपालिकेतर्फे कुठेही नदी नाल्यातील केर-कचरा काढण्यात आलेला नाही त्यामुळे काही ठिकाणी सार्वजनिक वापराचे आणि पावसाचे वाहून जाणारे सांडपाण्यास ठीक- ठिकाणी अतिक्रमणामुळे मोठा अडथळा निर्माण होणार आहे याकडे नगरपालिका बांधकाम अभियंता सुद्धा जाणीवपूर्वक दुर्लक्ष करीत असल्याने यावल नगरपरिषद मुख्याधिकारी,महसूल विभाग, पोलीस आणि सार्वजनिक बांधकाम उपविभाग यावल यांनी सयुक्तिकरित्या ठोस निर्णय घेऊन कडक कारवाई करावी असे संपूर्ण यावल शहरात बोलले जात आहे.
बिनशेती प्रकरण झाल्यानंतर विकासक आपल्या सोयीनुसार मर्जीनुसार लेआउटच्या बाजूला असलेल्या सार्वजनिक जागेवर नगरपरिषद मालकीच्या आणि महसूल मालकीच्या शासकीय जमिनीवर नदी नाल्यात भराव टाकून पाईप वगैरे टाकून आपल्या सोयीनुसार रस्ते तयार करून घेत आहेत,शासकीय जागेवर नदी नाल्यात अतिक्रमण संदर्भात यावल नगर परिषद कार्यालयात लेखी स्वरुपात तक्रारी करण्यात आलेल्या आहेत याकडे जिल्हाधिकारी जळगाव,नगर रचना विभाग जळगाव, यावल नगरपालिका,यावल महसूल विभागाचे अक्षम्य दुर्लक्ष होत आहे.
यावल नगरपरिषद कार्यालय, सार्वजनिक बांधकाम विभाग यावल कार्यालयापासून अर्धा ते एक किलोमीटर अंतरावर फैजपुर रोडवर मनुदेवी मंदिराजवळ आणि चोपडा रस्त्यावर महामार्गावरील पुलाजवळ नदीपात्रात मातीचा मोठा भराव टाकून अंदाजे तीन हजार स्क्वेअर फूट जागेवर नदीपात्रात अतिक्रमण करण्याचे काम अत्याधुनिक मशनरी ने मोठ्या वेगात सुरू आहे याकडे नगरपालिका बांधकाम विभाग आणि सार्वजनिक बांधकाम उपविभाग यावल यांचे दुर्लक्ष होत असल्याने संपूर्ण यावलकरांमध्ये संतप्त भावना व्यक्त करण्यात येत आहेत तरी याबाबत संबंधित सर्व अधिकारीवर्ग आणि लोकप्रतिनिधींनी लक्ष केंद्रित न केल्यास पुढील कायदेशीर कारवाईस ते जबाबदार राहतील असे सुद्धा बोलले जात आहे.