कोरोना पॉझिटिव्ह रुग्णांची संख्या पाहता प्रत्येक विभागाने सतर्क राहावे – जिल्हाधिकारी संजय यादव
शिंगावे येथील विलगिकरण कक्षाची जिल्हाधिकाऱ्यांकडून पाहणी
शिरपूर – कोरोना विषाणूचे पॉझिटिव्ह रुग्ण शिरपूर तालुक्यात आढळून आले आहेत. अशा परिस्थितीत आरोग्य विभागासह प्रत्येक विभागाने सतर्क राहावे, असे निर्देश जिल्हाधिकारी संजय यादव यांनी दिले आहेत.
जिल्हाधिकारी श्री. यादव यांनी आज शिरपूर तालुक्यास भेट देवून आरोग्य विभागासह विविध विभागांचा आढावा घेतला. त्यावेळी ते बोलत होते. यावेळी अपर जिल्हाधिकारी दिलीप जगदाळे, शिरपूरचे उपविभागीय अधिकारी डॉ. विक्रम बांदल, निवासी वैद्यकीय अधिकारी डॉ. विशाल पाटील यांच्यासह विविध विभागाचे प्रमुख उपस्थित होते. जिल्हाधिकारी श्री. यादव यांनी सांगितले, कोरोना विषाणूचा प्रादुर्भाव रोखण्यासाठी जिल्हा प्रशासनातर्फे विविध प्रकारच्या उपाययोजना सुरू आहेत.
शेजारील मध्यप्रदेशातील सेंधवा परिसरातही कोरोना विषाणूचे पॉझिटिव्ह रुग्ण आढळून आले आहेत. अशा परिस्थितीत सीमेवरील गस्त वाढवावी. आरोग्य विभागाने आवश्यक त्या उपाययोजना कराव्यात. तालुक्याचा काही भाग आदिवासी बहुल व डोंगराळ आहे. या भागात पुरवठा विभागाने विहित कालावधीत अन्नधान्याचा पुरवठा करावा. कोणीही नागरिक अन्नधान्यापासून वंचित राहणार नाही याची दक्षता घ्यावी. नागरिकांनी लॉकडाऊनचे नियम पाळत घरीच थांबावे. अफवांवर विश्वास ठेवू नये, असेही त्यांनी आवाहन केले.
त्यानंतर जिल्हाधिकारी श्री. यादव यांनी शिरपूर तालुक्यातील शिंगावे येथे भेट देऊन तेथे कार्यान्वित करण्यात आलेल्या संस्थात्मक विलगिकरण कक्ष, कोविड केअर सेंटर, उपजिल्हा रुग्णालय, इंदिरा गांधी रुग्णालय, नगरपालिकेस भेट दिली. तसेच महाराष्ट्र व मध्यप्रदेश च्या सीमेवर भेट देवून तेथील बंदोबस्ताचा आढावा घेतला.
